ఏంటో ఈ బ్యాచిలర్ జీవితానికి బొత్తిగా ఒక రంగంటూ ఏలాగు లేదు ఇప్పుడు రుచి కూడా లేకుండా పోతుంది మరి..! అర్రే... మొన్నటికి మొన్న బెండకాయ కూరలో కోడిగుడ్డు వేసి మాడ గొట్టి వండి మరీ మధ్యాహ్న భోజనం సిద్దం చేసిన వంటవాణ్ని మెచ్చుకోవాలో, మీద పడి కరిచేయాలో అర్ధం కాలేదు...!! కొన్ని రకాల వంటలు తిని ఈ మధ్య నాలో నేనే మాట్లాడుకుంటున్న అంటే నమ్మండి... ఉత్తర భారతంలో ఉన్నపుడు ఉప్పు ఎలాగు నాలుకకు అంటదు కారం మాట దేవుడెరుగు... ఆ మధ్య బెల్లం వేసి వండిన బిర్యాని తిని ఒక గంట సేపు జపనీస్ బాషలో మాట్లడానంటా... నాక్కూడా..., నాకు తెలియని జపనీస్ బాష వస్తుందని అది విన్న స్నేహితులు చెప్పేదాకా తెలియలేదు. అర్రే నా బుర్ర బురదలో ముంచేసి మల్లి నా తలకాయలో పెట్టుకున్నట్లు ... వంకాయలో చింతపులుసు పోయటం ఏంటి మరీ నా శ్రార్ధం కాకపోతే..... ఛీ అది తిన్న నా నాలుకను గోతిలో తీసి కప్పెట్ట...! ఈ మధ్య అయితే మరీ వింత వింత వంటలు రుచి చూడటం నాకే చెల్లింది. అర్రే మొన్నటికి మొన్న హైదరాబాద్ లో ఖాలిగా ఉన్నప్పుడు కాకరకాయ కరివేపాకు అని యూట్యూబ్ లో చూసి మరీ వండితే కాకరకాయ మాడింది కరివేపాకు మిగిలింది... ఆఫ్ కోర్స్ ఆ మిగిలిన కరివేపాకుతో నా భోజనం కానిచ్చేసానుకో...!
ఈ సారి ఇలా కాదని ఖాళిగా ఉన్నప్పుడు గరిటె తిప్పి మనమెంటో గర్వంగా ఈ ప్రపంచానికి చాటి చెప్పాలని మైండ్ లో బ్లైండ్ గా అనుకున్న. యూట్యూబ్ లో రోజుకో వెరైటీ చూస్తూ వీలున్నపుడల్లా రోజుకో వింత వంటకంతో నా విదేయులపైనే ప్రయోగించా... నా వంటలు తిన్న వాళ్ళు ఆ వంటతో పాటు రోజుకో కొత్త పదాన్ని కూడా నేర్చుకున్నారు.... ఆ వంటలన్నీ ఎలా వండానో ఒక గ్రంథం రాసి అచ్చు వేసి దాని మీద వచ్చిన డబ్బులతో ఏదైనా చారిటీ సంస్థకు విరాళామివ్వాలని నిర్ణయించుకున్నప్పటికి స్నేహితులు వద్దని వారించారు. ఎందుకంటే అది ఎవడైనా పొరపాటున కొని దానిలో ఉన్న వంటలు ప్రయత్నించి.., అది రాసిన నన్ను రోజుకో అడ్రెస్స్ కి వచ్చి కొడతారేమో అని వద్దన్నారని తెలిసి నాక్కూడా నిజమే అనిపించి ఆ వంటల పుస్తకం రాద్దామన్న ఆలోచనను ఆదిలోనే చంపేసాను.... నా వంటలు తిన్న స్నేహితుల్లో ఒకడు అరేయ్ ఎందుకిరా ఇవ్వన్ని బాధలు.. చక్కగా పెళ్లి చేసుకుంటే ఈ అడ్డమైన బాధలు తప్పుతాయి కదా అన్నాడు... నోర్ముయ్ వెధవ..., వండి పెట్టె మనిషి కోసమే మనువాడే ముదనష్టం మొహమూ నువ్వునూ... ఇంకా ఎక్కువ మాట్లాడావంటే నేను చేసే వారం రోజుల వంటలు ఒకేసారి చేసి నోట్లో కుక్కుతా.... అని, మరో కొత్త వంటకం ఎం దొరుకుతుందా అని యూట్యూబ్ లో వెతుకుతుండగా బుర్రలో ఐడియా గిర్రున తిరిగింది. అసలు వంటలు మనమే ఎందుకు చేయాలి. బట్టలు ఉతకటానికి వాషింగ్ మిషన్ ఉంది... పిండి రుబ్బటానికి గ్రైండర్ ఉంది. మరి వంటలు చేయటానికి మిషన్ ఎందుకు లేదబ్బా.. ఒక మీట నొక్కగానే అన్ని పోపులు వేసేసి మాడగోట్టకుండా మతి పోగొట్టే మిషన్ వస్తే ఎంత బాగుండు... ఏంటి నేను ఇదంతా ఆలోచిస్తున్నా... నేను తినే ఈ వంటల దెబ్బకి నా మతి పొయిందా ఏంటి.... ఇంక వెంటనే మల్లి యూట్యుబ్ ఓపెన్ చేశాను రేపు మసాల మటన్ అనే కొత్త వంటకంతో వేరే వాళ్ళ మతులు పోగొట్టేద్దామని...!!
హరికాంత్ రెడ్డి
